أتمنى اكون اعلاميه شاطره ومطربه ناجحه
مذيعه شابه تخرجت من الاكادميه الدوليه لعلوم الاعلام قسم راديو وتليفزيون وعلى الرغم انها تخرجت العام الماضى وانها تعتبر اصغر مذيعه فى قناه دريم الا انها حققت نجاحا كبيرا من خلال تقديمها لبرنامج شبابيك كما انها فاجئتنا مؤخرا بصوتها العذب من خلال اغنيه انا مصريه علشان كده كان لينا معاها الحوار ده علشان نتعرف عليها اكتر
1- اِزاى التحقتى ببرنامج شبابيك ؟
الموضوع كان قدرى جدا سمعت انهم محتاجين مذيعين جداد فروحت وقدمت وقابلت رئيس القناه وطلب منى اعمل تيست كاميرا وبعد كده كلمونى وقالولى انى نجحت واتقبلت الحمد لله
2- أحكيلنا عن شعورك فى اول مره تقفى امام كاميرا ؟
هى مكانتش اول مره لان دراستى عمليه وواجهت كاميرات كتير لكن منكرش ان اول حلقه من شبابيك كان ليها رهبه وخاصه انى خجوله جدا لكن من الحلقه الثانيه الامور بقيت طبيعيه جدا
3- على الرغم انك تعتبرى اصغر مذيعه فى دريم الا انك حققتى نجاح كبير جدا هل كنتى تتوقعى النجاح ده ؟
تضحك وتقول هو انا فعلا اصغر مذيعه لكن الحمد لله انا متوقعتش طبعا النجاح بس انا كنت داخله اعمل حاجه بحبها وديه اهم حاجه وفى نفس الوقت دراستى وهوايتى
4 - شبابيك اضافلك ايه ؟
شبابيك كان اضافه كبيره جدا ليا لانه كان اول شغل ليا واتعلمت منه روح التعاون وحبيت البرنامج جدا وحسيت انى وسط اخواتى بجد وكفايه ان الناس كانت تكلمنى تقولى ساره شبابيك وده كان بيبسطنى جدا
5 - هل صحيح ماتردد مؤخرا ان قناه دريم الغت برنامج شبابيك ؟
هو البرنامج متوقف حاليا بسبب بعض الظروف اللى بتمر بيها القناه لكن موضوع الغاءه ده انا معنديش فكره بصراحه وان شاء الله يرجع قريب
6 - على الرغم من نجاحك كمذيعه الا انك اتجهتى للغناء مؤخرا ايه السبب ؟
بصى هأقولك على حاجه انا الغناء ده رقم واحد فى حياتى بحبه جدا وكنت بغنى من وانا عمرى 7 سنين كنت بغنى وبعزف جيتار فى حفلات المدرسه وكان نفسى جدا اكون مغنيه
7 - ازاى جاتلك فكره اغنيه انا مصريه ؟
من كتر الاحداث والظروف اللى كنا بنمر بيها كان كل واحد لازم يساعد باللى يقدر عليه وحسيت اننا عايزه اغنى واعبر عن اللى جوايا وجوا كل مصرى حتى قلت انا مصريه وده شرف ليا ان انتى تبقى بلادى يعنى كلام طبيعى جدا كنت حاساه اوى وانا بغنى والاغنيه من كلمات احمد عبد ربه والحان احمد مصطفى وتوزيع ياسر صلاح
8 - ايه هى اكتر الانتقادات اللى توجهتلك عقب عرض الاغنيه ؟
هو ملحقش يكون فى اى انتقادات لانها لسه متعرضتش على التليفزيون هى نزلت على النت بس والحمد لله انتشرت جدا ونجحت اوى وانا مبسوطه برد فعل الناس
9 - ايهما افضل بالنسبه لكى الغناء ام التقديم ؟
بحب الاثنين جدا لان زى ماقلتلك الغناء فى دمى من وانا صغير والاعلام دراستى وهوايتى
10 - هل ممكن نشوفك ممثله زى دينا وعمرو ؟
بصى التمثيل لسه بدرى عليه شويه انا دلوقتى عايزه اركز فى اللى اقدر عليه عارفه المثل اللى بيقول" صاحب بالين كذاب وصاحب ثلاثه منافق " هوة كده مش عايزه اشتت نفسى لكن لو اتعرض عليا دور محترم ومش هايقلل منى ممكن اقبله
11 - وايه خططك الجايه ؟
هصور ان شاء الله كليب اغنيه انا مصريه علشان يتعرض فى الفضائيات وبحضر لاغنيه هتتذاع فى رمضان اسمها يارب فى حقك مقصره وبحضر لمينى البوم قريبا
12 - طبقا لاغنيه انا مصريه ساره عادل بتحلم بايه كبنت مصريه ؟
على المستوى الشخصى أتمنى اكون اعلاميه شاطره ومطربه ناجحه يعنى نفسى اعمل توازن بين الاثنين
وعلى المستوى العام نفسى كل واحد فينا يفكر فى مصلحه بلاده لان الثوره حققت احلام الشعب المصرى لازم بقى نحافظ عليها ومنخليش دم الشهداء يروح هدر لان ده وقت بناء وعمل
حوار / هاجر مجدى
تصوير : أشرف بيلا
رائعة يا هاجر
ردحذفيارب ديما في تقدم :)
ربنا يخليكى يا ساره كلك ذوق ويارب يوفقك انتى كمان فى حياتك كلها يارب ان شاء الله :)
ردحذف