مصر رايحه على فين ؟؟

قبل 25 يناير كانت الحياه عاديه جدا وكنا راضيين بحياتنا

راضيين بالكوسه والواسطه والرشاوى واهانه الضباط للمواطنين بطرق غير انسانيه

كنا راضيين بنهب حقوقنا وسرقتها ومكناش بنتكلم وكان كل اللى علينا هو اننا نفضفض لاصحابنا او لقرايبنا ولو كان بعض الصحفيين اتكلم وقال بس كلام ميعجبش النظام الدنيا تتقلب عليه !!!! بس خالى بالك متنساش ان فى حريه صحافه

وكانت حريه الصحافه عندنا انك تعمل كل اللى نفسك فيه بس لحد النظام تقف ومتتعداش خطوطك الحمرا مع ان دستور بلدك كان بيقول ان الصحفى حر وان محدش ليه سلطان عليه !!! متستغربوش انى عارفه ماده فى الدستور

اصلى كنت بقرا مواد الصحافه كتير بحكم انى هبقى صحفيه فى المستقبل ان شاء الله ده لو عرفت

ما علينا نكمل موضوعنا وطبعا اعلامنا كان رائع مفيش مصداقيه مثل مصداقيه اعلامنا المصرى والدليل على كده تلاقينا 24 ساعه امام القناه الاولى والثانيه !!! طبعا بنشجع انتاج بلدنا  ( صنع فى مصر !!!!) وطبعا كان بيتقال علينا اننا شباب تافهه وسيس ومش فاهم فى اى حاجه غير القعاد على القهاوى والنت كافيه ومعاكسه البنات والشات

ولما حصلت ثوره 25 يناير محدش كان مصدق ان الشباب دوول اللى بيتقال عليهم سيس هما اللى اسقطوا نظام استمر 30 عام ومحدش عرف يعمل زيهم وطبعا الكل بقى دلوقتى بيقدرهم ويضربولهم تعظيم سلام

وفى اثناء فتره الثوره عشنا اجمل شعور ممكن يعيشه اى مصرى شعور بالفخر انك مصرى , الكل كان بيشارك سواء فى ميدان التحرير او من خلال الدعاء او من خلال شغله

البنات كانت بتمشى فى الميدان وسط تجمع ملايين من الشباب محدش بيعاكسها بالعكس ده فى شاب مات علشان بيدافع عن بينت ميعرفهاش ولاول مره فى حياتى حسيت انى انسانه بجد وليا صوت لدرجه ان الداعيه معز مسعود قال جمله شهيره جدا " الشعب يريد اخلاق الميدان "

لكن لما الثوره خلصت  والرئيس تنحى مفيش كام يوم ورجعت ريما لعادتها القديمه

معاكسات فى الشوارع وبلطجه مالهاش حل L طب هو احنا كنا بنعمل الثوره ديه ليه ؟؟؟ مش علشان الامان , الاستقرار , الحريه , العدل

طب هو فين الامان اللى علشانه ضحوا مئات من الشباب بارواحهم

لما مدير اداره عند والدى فى الشغل يطلع عليه بلطجيه وهو فى حدائق القبه الساعه 2.30 الظهر ويثبتوه علشان ياخدوا منه فلوس ولما يطلع معهوش يضربوه بمطوه والراجل الله اعلم بحاله عامل ايه دلوقتى .

لما اختى وهى راجعه من كليتها الساعه 3 العصر وهى فى كليه الهندسه جامعه عين شمس يعنى فى العباسيه اللى هى من اكتر المناطق الحيويه فى القاهره ويطلع بلطجى فى المينيباص اللى هى راكباه ويكون معاه سكينه ويهدد السواق بالقتل وبيروع الركاب اللى كان اغلبهم بنات !!! يبقى فين الامان ولما تقولى انا نزلت من المنيباص ومش عارفه نزلت ازاى وبعدين تروح لعربيه شرطه  واقفه فى الطريق وتحكي لشرطى اللى حصل وهى خايفه يضحك ضحكه خبيثه ويقولها لا طبعا ميصحش  الراجل يعمل كده !!! تقوله هو ده اللى قدرت عليه يقولها شايفه الضابط اللى هناك ده روحى قوليله !!! قالتله انا اللى اقوله بقت واقفه مزهوله من رد فعله . يبقى فين الامان !!

لما بنت خالتى يطلع عليها بلطجيه وهى فى عربيتها ولولا ستر ربنا عرفت تهرب منهم يبقى فين الامان !!

لما قريبى يتسرق الموتسيكل بتاعه ويضطر يدفع 7 الاف جنيه علشان يرجعه بعد طلوع الروح والرعب اللى كان فيه يبقى فين الامان !!!

ياترى هى ديه نتائج الثوره اللى بسببها ضحى مئات بارواحهم علشان احنا نعيش فى امان

ياترى يا مصر رايحه على فين ؟؟ ياترى الثوره ديه كانت فعلا بدايه تحرر وامان وعدل ولا بدايه لعصر مليان بالبلطجه والرعب ؟؟

طب ياترى مين المسؤل عن البلطجه ديه ؟؟ هل دوول مجرد مجرمين عاديين ولا دول ناس من فلول النظام القديم  علشان نندم ونقول فين ايامك يا مبارك ؟؟

لدرجه ان فى قله طلعت دلوقتى بتطالب بالافراج عن العادلى وعوده مبارك للحكم علشان نرجع على الاقل للامان اللى كان موجود قبل الثوره !!! ايه التهريج ده

سمعت من وزير العدل فى حوار ليه على الحياه اليوم انهم عارفين ان اللى بيعمل كل ده قله من اعضاء مجلس الشعب وبعض البلطجيه المعروفين علشان يهمدوا الثوره !!! طب طالما انتم عارفين مبتتحركوش ليه ؟؟ فين الجيش ؟؟ فين الشرطه الى بقى وجودها زى عدمه ؟؟ يعنى الشرطه اما تعذب الناس وتضربهم اما تشيل ايدها من اى حاجه بحجه انهم خايفين يضربوا حد والدنيا تتقلب عليهم تانى !! ايه المنطق الغريب ده

لما حاولت اقارن بين قبل 25 يناير وبين بعدها مبقتش لاقيه غير فروق بسيطه وكل اللى انا شايفاه ان مبارك تنحى وخلاص وكل حاجه فضلت

يعنى لما ابقى ماشيه فى الشارع مرعوبه وحاسه ان ممكن حد يطلع عليا واشوف عربيه شرطه ملاكى ماشيه باقصى سرعه وعكس الاتجاه وبعدين الاقى العسكرى جرى وراها علشان يوقفها وقال اقف اقف ورمى نفسه امام العربيه وقاله يا فندم ده عكس الاتجاه مش شايفنى بمنع الناس يمشوا فيه  يقولوه عادى يعنى وانا حر والكلام المستفز ده وكان هيتخانق مع العسكرى لولا واحد من المواطنين جيه وزعق للضابط وقاله مينفعش كده حضرتك واجبروه انه يمشى فى الاتجاه السليم

يبقى مصر رايحه على فين ؟؟

كلامى ده مجرد فضفضه من واحده بتحب بلدها بجد وبتخاف عليها وزى زى اغلب المصريين قلقانين من اللى 

جاى ومش عارفين مصر رايحه على فين ؟؟

 ملحوظه انا اخترت اكتب باللون الاحمر كرمز لدماء الشهداء اللى ضحوا بحياتهم علشان احنا نعيش فى سلام 

مشهد اصابنى بالقشعريره

لقد شاهدت فيديو you tube على الانترنت أصابنى بقشعريرة داخل جسدى

 وغرغرت عينى بالدموع 

لجمال هذا الفيديو وشدة تأثرى بة 

فهو عبارة عن فيديو لفهد وجد قردة فهجم عليها واراد أن يفترسها الا انة وجدها حامل

 فصعبت علية فحملها الى مكان بعيد حتى لا يؤذيها احد وأثناء حملة لها سقط الجنين 

من بطنها

 قرد صغير فأخذة الفهد بكل رفق وحنية ووضعة فى مكان بعيد حتى لا يفترسة أحد 

وظل يحنو علية ويقبلة ويخاف علية وكأنة هو امة .

فمن يتخيل ان الفهد الذى اراد ان يفترس امة هو الان يحنو علية اكثر من امة !!!!

سبحان اللة انها حقا رحمة اللة سبحانة وتعالى .

قال رسول اللة صلى اللة علية وسلم "جعل اللة الرحمة مائة جزء فأمسك عندة تسعة 

وتسعين جزءا وأنزل فى الارض جزءا واحدا فمن ذلك الجزء يتراحم الخلق "

سبحان الله !!!!! 

رساله حب

أود أن أرسل رسالة حب من كل قلبى باسم طلاب الفرقة الرابعة قسم الاعلام جامعه عين شمس


 الى أستاذتنا ومعلمتنا وقدوتنا د سوزان القلينى الى من علمتنا أسس الاعلام وكيف نصبح اعلاميين شرفاء 

كم حزنا لفراقك يا دكتور تركتينا ونحن فى أخر عام فى الكلية ونحن فى أشد الحاجة اليكِ


 وعلى الرغم من حزننا لفراقك الا أننا نتمنى لكِ من كل قلبنا  التوفيق لكى فى حياتك العملية 

وها نحن الان نبذل قصارى جهدنا فى مشروع تخرجنا لكى نقدمة هدية لكِ  لتفخرى بأبنائك وبناتك


 ولتعلمى أن مجهودك وتعبك معنا لن يذهب هباء 

د سوزان على الرغم من انك بعيدة عن أعيينا الا أنك مازلت فى قلوبنا 

وحشتينا يا دكتور 


هذا المقال كان من احدى مقالاتى لمشروع تخرجى العام الماضى ... اعلام عين شمس 2010 شعبه صحافه 

حوارى مع الداعيه أستاذ مصطفى حسنى بتاريخ 16 / 4 / 2010

خدعوك فقالوا ان الشباب ضائع 

زوجتى لها دور كبير فى نجاحى ..والبنات اساس اى شعب 

( خدعوك فقالوا ) ان الدين اكتئاب بالعكس فقد عشنا معه كشباب ( أحلى حياه ) وبحثنا معه عن ( الكنز المفقود ) فوجدنا أجمل ( قصه حب ) فى الوجود 
انه الداعيه الشاب مصطفى حسنى الذى أستطاع ببساطة أسلوبه وسهولة دعوته ان يصل الى قلوب عدد كبير من الشباب ويصبح مثلا اعلى لهم 
قدم العديد من البرامج الناجحه على قناه اقرا ويقدم حاليا الجزء الثالث من برنامجه الرائع خدعوك فقالوا وعن هذا البرنامج سالناه الاتى : 

من أين جاءت فكره خدعوك فقالوا ؟ 

فكرة خدعوك فقالوا فكره نشأت من التفكير فى واقع المسلمين وما يحتاجون اليه فهل هم فى حاجه الى نصائح بالحرام والحلال وافعل ولا تفعل أم فى حاجه الى تغيير الافكار الخاطئه التى تكون المفاهيم الخاطئه التى يصدر منها سلوكياتنا وهذا ما اركز عليه دائما فى البرنامج لآن العقول اذا 
كانت بها مفاهيم سليمه ستعطى للانسان اوامر بأن يتصرف تصرفات سليمه فيجب ان نضع ايدينا على "المرض " مباشره ونعالجه وهذه هى فكره خدعوك فقالوا الا وهى تصحيح المفاهيم الخاطئه 

لماذا سمى بهذا الاسم بالتحديد ؟ 

هو اسم من اختيار فريق اعداد البرنامج لان اغلب المفاهيم الخاطئه التى تتكون داخل عقل الانسان تتكون من موروثات الاسره والمجتمع وهو يعتقد انها صحيحه وهذه خدعه لان هذه المفاهيم خاطئه
فيجب ان نكشف هذه الخدعه كما ان خدعوك فقالوا اسم قريب من الاذان فقمنا بأختياره .

يوجد صحوه بين شباب هذا العصر 

ماهى أكثر المفاهيم الخاطئه التى لاحظت انتشارها بين الشباب فى الفتره الاخيره ؟ 

فى الحقيقه هذا السؤال اجابته طويله جدا لان فى كل جوانب حياتنا توجد مفاهيم خاطئه سواء فى الجوانب الشرعيه فى علاقتنا مع الله سبحانه وتعالى او الجوانب الاجتماعيه فى علاقتنا مع بعضنا البعض او الجوانب النفسيه وكيفية تعاملى مع نفسى وفهمى لطبيعة نفسى لذلك يجب ان ننظر الى سلوكياتنا الخاطئه النابعه من مفاهيم خاطئه ونحاول تصحيح هذا المفهوم لتنصلح السلوكيات . 

لماذا يعيش الشباب حاليا حاله من التخبط ؟ 

ليس كل الشباب.أنا مؤمن بفكرة ان الخير يزيد فى امتنا و فى جيلى انا لم يكن هناك كل هذا الخير.. بصراحه اشعر انه يوجد صحوه فى شباب هذا العصر 

لماذا نلاحظ غالبا فى ندواتك ان البنات اكثر من الشباب ؟ 

فى الحقيه ليست فى ندواتى فقط بل فى اى عمل خير نجد البنات اكثر. يمكن لان عندهن سرعة استجابه عن الشباب واكثر تنظيما لوقتهن وبالتالى يستطعن حضور الندوات الدينيه والثقافيه.
وبصراحه اذا كانت الصحوه فى البنات فهذا خير لآن البنات هن أساس أى شعب. 

(ظهر فى الفتره الاخيره العديد من الدعاه الشباب )هل كثره هؤلاء الدعاه يهدد الدين ؟ 

بالعكس كثره الدعاه الشباب خيرلآن الجيل الجديد سيجد من يعبر عنهم وعن افكارهم واحلامهم فمشكله الشباب انه يخاف السماع للدين بسبب شعوره ان محدش فاهمه
مثلا مين من الشباب بيسمع الشيخ الشعراوى على الرغم أن اسلوبه بسيط جدا ويمكن أسهل من دعاه كثير يمكن يكون شكلهم " مودرن " لكن فرق السن مع فرق الشكل هو المشكله 

الا يؤدى كثرة الدعاه الشباب الى الاختلاف فى بعض الامور وبالتالى يحدث تضارب عند الشباب ؟ 

الاختلاف ليس له علاقه بكثره الدعاه الشباب فهذا يكون فى طبيعة أشخاص تحب الظهورعلى حساب الاخرين
او فى تكوين البعض ممن ليس لها اهداف بناءه ولكن ما يهمها هو الأشاره على أخطاء الآخرين . 

ماهى مواصفات الداعيه الناجح من وجهه نظرك ؟ 

اولا اى رجل دين ناجح يجب ان يكون طالب للعلم الشرعى باستمرار
وثانيا يجب ان يكون واحد من الناس أى يعيش معهم ويشعر بهم لكى يدرك طبيعة العقول التى يخاطبها أما الكلام من الآبراج العاليه دون الآنغماس فى حياه الناس سيؤدى الى بعد الناس عن ربنا اكثر مايقربهم .
وثالثا وأهم شىء انه يكون فاهم دينه صح فى علاقته بينه وبين ربنا وعلاقته بينه وبين الناس وعلاقته بينه وبين هذا الكون الذى يجب عليه تعميره . 

كنت بحلم أكون مؤثر..!! 

اصبحت داعيه ناجح ومؤثر جدا هل كنت تتوقع هذا النجاح ؟ 

بصراحه كنت بحلم يكون لى تأثير وكنت بدعى ربنا اما مساله النجاح او عدم النجاح فكانت اقرب للامنيه من التوقع . 

هل تصدق من يقول وراء كل رجل عظيم امراه ؟ 

اكيد 

اذن ماهو الدور الذى لعبته زوجتك معك فيما وصلت فيه الان ؟ 

زوجتى لها دور كبير جدا فى نجاحى لانه لا يوجد اى انسان ناجح وتوجد فى حياته فجوه "عملاله صداع " واى انسان يريد تحقيق نجاح معين يجب ان يعطى وقت كبير لهذا النجاح 
وزوجتى كان لها دور كبير فى ذلك لانها كانت تقوم بمسؤلياتها ومسؤلياتى تجاه المنزل والاولاد حتى تفرغ ذهنى للدعوه وطلب العلم والتفكير فى كيفيه تقديم المواد الشرعيه للناس . 

ما عمر اولادك ؟ 

على 7 سنوات
وهنا 3 سنوات 

ماذا تتمنى لهما ؟ 

علي بيحب كره القدم جدا ونفسه يكمل فيها وانا نفسى يكون دكتور الى جانب كره القدم
اما هنا ففى الحقيقه لم اتمنى لها شىءالان لانها لسه صغيره جدا 3 سنوات . 

هل ستترك لهم حريه الاختيار فى تكوين مستقبلهم ام ستفرض عليهم امنياتك ؟ 

انا المهم عندى انى ازرع بداخلهم القيم والمبادىء وبعد ذلك يختاروا حياتهم مثلما يتمنوا وقدر ربنا هو اللى هيتحقق
لان اهم شىء عندى انهم يعيشوا حياه ممتعه ولو فرضت عليهم شىء مش بيحبوه اكيد مش هيستمتعوا . 

لو طلبت منك اعطاء نصيحه للشباب لكى يعيشوا حياه متزنه فيها ارضاء لله سبحانه وتعالى وتحقيق لاحلامهم وطموحاتهم فماذا تقول ؟ 

كثير من الشباب خايف يقرب لربنا لان الاعلام بيصور الدين بشكل معين فيتخيل الشباب انهم لو قربوا هيتركوا شهوات كثيره بيستمتعوا بيها وهذا غير صحيح
ونفسى اى حد يسمعنى انه يحاول يقرب لربنا فعلا هيستمتع ويعيش احلى حياه . 

لو طلبت من مصطفى حسنى يقول خدعوك فقالوا على شىء ما فماذا يقول ؟ 

خدعوك فقالوا ان الشباب ضائع
بالعكس الشباب بيحب ربنا جدا وبيحب الخير لكن هو محتاج انه يعرف الطريق الصح والسهل اللى يقدر يستمر فيه . 


ملحوظه هذا الحوار تم تسجيله يوم 16 / 4 / 2010 لمجله م الاخر وهى مجله مشروع تخرجى باعلام عين شمس