نفسى أجسد شخصيه جمال عبد الناصر بطريقه كوميديه
فنان شاب تخرج من كليه تجاره جامعه حلوان كان ضمن ابطال مسرحيه قهوه ساده ولكنه يعتبر اشهرهم حاليا شارك فى العديد من الاعمال الدراميه والسينمائيه مثل طير انت والكبير أوى وكابتن عفت هو الفنان الشاب هشام اسماعيل تعالو نتعرف عليه اكتر من خلال حواره معانا فى لوكيشن
1- اِزاى أترشحت لمسرحيه قهوه ساده ؟
قبل قهوه ساده كان فى مشوار بسيط من الكفاح الطبيعى فى الحياه أشتركت فى فريق مسرح الجامعه وعملنا مسرحيتين وبعد ما تأكدت من موهبتى قدمت فى الدفعه الثانيه فى مركز الابداع وكان عندى اصرار انى انجح والحمد لله نجحت وعملنا قهوه ساده للمخرج خالد جلال
2- قهوه ساده حققت نجاح كبير جدا اثناء عرضها هل كنت متوقع النجاح ده ؟
بصراحه كنت بتمنى لان كل عوامل النجاح كانت متوفره واتدربنا عليها اكثر من سنه لكن النجاح بالشكل ده بصراحه محدش كان متوقعه
3- تعتبر من أشهر ابطال قهوه ساده حاليا وشاركت بعدها فى كتير من الاعمال الدراميه والمسرحيه اِزاى جات لك الفرصه ديه ؟
الفنانين كانوا بيجولنا المسرح ويتفرجوا علينا ويقيمونا وبعده كده فوجئت بالمخرج أ / شريف عرفه بيطلب منى انى اصور معاه اعلان لاتصالات وبعده كده طلب منى الفنان احمد مكى انى اشاركه فى فيلم طير انت ومسلسل الكبير واللى بعتبرهم هما سبب شهرتى ونجاحى الحمد لله
4 – أرتبط أسمك بتقليدك لبعض الشخصيات العامه هل ده كان بيضايقك ؟
لا خالص بالعكس كان بيسعدنى جدا خصوصا فى الاول لكن انا بحاول انى مطلعش كل طاقتى فى الشخصيه اللى بقلدها علشان الناس متربطنيش بيها يعنى لما اقلد عمرو خالد محاولش اتقمسه اوى علشان لما اقلد طارق علام مثلا الناس تنسى عمرو خالد وتفتكر طارق علام وهكذا
5 – قلدت عمرو خالد فى مسلسل الجماعه بطريقه ساخره جدا مخوفتش من كده خصوصا ان عمرو خالد له جمهور كبير ؟
الناس فاهمه غلط أنا مقلتدش عمرو خالد ولو كنت عايز أقلده كنت قلدته لكن انا قدمت نموذج حقيقى لبعض الدعاه الموجودين دلوقتى اللى دايما بيبدؤا بنوايا صادقه وتنتهى معاهم بمصالح شخصيه وعمرو خالد مش منهم
6- تشارك حاليا فى ثلاثه اعمال دراميه هل تعتبر نفسك محظوظ خصوصا فى ظل الازمه اللى بنمر بيها دلوقتى ؟
بصى انا الحمد لله بحاول دايما اعمل اللى عليا واجتهد فى الشخصيه اللى بقدمها لانى حابب اقدم حاجه ومش بتهمنى الفلوس خالص وده اللى بيخلى الفنانين والمخرجين يطلبوا منى انى اشاركهم فى اعمالهم
7- كلمنا عن ادوارك فى الاعمال ديه ؟
فى مسلسل الذات بقدم شخصيه شاب قبطى صديق لعائله ذات ومن الطبقه المتوسطه والمسلسل بيقدم الفتره التاريخيه فى مصر منذ الخمسينات وحتى الان واتاجل لان المؤلفه مريم ناعوم بتكتب كمان 15 حلقه تتضمن احداث ثوره 25 يناير
وفى عريس دليفرى بجسد شخصيه صديق البطل الفنان هانى رمزى وهى كوميديا للكوميديا لان الناس محتاجه تضحك خصوصا بعد كم الاخبار السياسيه والاحداث الى بنمر بيها دلوقتى وبكمل تصوير الجزء الثانى من مسلسل الكبير أوى
8- ايه رأيك فى فكره القوائم البيضاء والسوداء للفنانين وشايف انها هتأثر على الفن فى المرحله الجايه ؟
أنا شايف ان يكون فيه قوائم منقطه !!! بصى مافيش فنان كان ضد الثوره كلنا كنا مضايقين من الفساد والظلم بس المشكله كانت فى طريقه التفكير يعنى مثلا الفنان عادل امام اللى قالوا انه كان ضد الثوره ده اكثر فنان حارب فى اعماله النظام السابق ومينفعش انى اضع فنان فى قائمه بيضاء واقول انى هشاهد كل افلامه لمجرد انه شارك فى الثوره حتى ولو كانت افلامه بتدعى للعرى!! والعكس وده اللى اقصده بالقوائم المنقطه يعنى القوائم ديه لازم تكون على اساس الفن والفكر وهو ده الصح
والموضوع هياخذ وقته ويخلص بسرعه وبكره الناس تنسى لاننا شعب طيب وبينسى بسرعه
9- شاركت فى اعمال مسرحيه وسينمائيه وتليفزيونيه أيهما افضل بالنسبه لك ؟
كل عمل وله متعته واهم حاجه الدور اللى بجسده لكن طبعا السينما حاجه تانيه خالص ونفسى اكون نجم سينما
10- فى رايك ايه هو العمل اللى صنع نجوميتك ؟
الحمد لله كل عمل قدمته ساهم فى نجاحى لكن بعتبر تجربتى مع الفنان احمد مكى هى اللى شهرتنى بين الناس
11- فى الاخر لو سألتك عن دور بتحلم بتجسيده يكون ايه ؟
نفسى اجسد شخصيه جمال عبد الناصر بطريقه كوميديه وكل الشخصيات التاريخيه بطريقه كوميديه .... الناس شايفه ان الشخصيات ديه جاد اوى مع انهم ناس زينا وليهم هفوات ومواقف كوميديه فى حياتهم وانا شايف ان الموضوع ده لو أتعمل هينجح أوى
حوار : هاجر مجدى
